Wia dis foto come from, PDP
Read am in 4 mins
Di Court of Appeal for Abuja don dismiss di appeal by one faction of di Peoples Democratic Party (PDP) against di judgment of Justice James Omotosho of di Federal High Court wey order di Independent National Electoral Commission (Inec) make dem no recognise di result of di national convention wey di faction bin hold for Ibadan, Oyo State, on November 15 and 16, 2025.
All di three court of appeal justices wey consider di appeal rule say di appeal by Kabiru Turaki faction of di PDP no get merit, and say di Federal High Court dey right for di judgement wey dem deliver for October 31, 2025 asking di PDP to not go ahead wit di national convention bicos e no follow di party constitution.
Di appeal court also award di sum of N2 million as damages against di Turaki group for filing appeal wey no get head.
Judgement still dey go on for di oda matas wey concern di PDP wey dey bifor di court of appeal. In total, e get nine PDP cases bifor di appeal court wey dem go decide on dis Monday.
PDP – wey be di ruling party for Nigeria until 2015 – suppose be di major opposition political party for di kontri but internal katakata no gree make dem come togeda to try to win power bak from di ruling All Progressives Congress (APC).
As di party dey now, e get two factions, one of dem dey unda di control of Seyi Makinde, di guvnor of Oyo State, Bala Mohammed di guvnor of Bauchi State and Dauda Lawal di guvnor of Zamfara State.
Di oda faction dey loyal to di Minister of di Federal Capital Territory, Nyesom Wike, who don refuse to leave di party despite say e dey for di cabinet of President Bola Tinubu who be APC pesin.
Wetin dey expected for court today
Di nine separate appeals wey di Court of Appeal don join togeda to deliver one judgement on top all dem, na sake of different judgements from di Federal High Court delivered by Justices James Omotosho, Peter Lifu and Joyce Abdulmalik.
On October 31, 2025, Justice Omotosho bin order INEC say make dem no recognise di outcome of di national convention wey bin hold for Ibadan, Oyo State, bicos di convention no follow di constitution of di PDP.
Also on November 14, 2025 Justice Peter Lifu give judgement say di PDP planned convention no go fit go ahead unless dem add di name of di former guvnor of Jigawa State Governor Sule Lamido as one of di candidates for di office oc national chairman.
Lamido bin file di suit for court say di organisers of di conventin bin remove im name from di contestants witout any good reason, and say dem deny am im rights as a legit member of di party.
Den, afta di convention, di new leadership of di PDP led by Turaki also go to court to order Inec to recognise dem, but Justice Uche Agomoh deny di request.
Di judge rule say Turaki and im team bin don disobey two former rulings of di high court, so dem no get. any justification to approach di court and ask for anything.
Following di judgement, di Turaki team file appeal for di court of appeal and e follow for di judgement wey go dey delivered this Monday.
Di judgement of di appeal court go make am more clear who be di true-true leadership of di PDP especially as di Independent National Electoral Commission (Inec) don bring out di timetable for di 2027 general election.
Inec don announce say political parties go start dia primary elections from April 23 to May 30 dis year ahead of di elections, and dem go need to dey sure which of di two PDP factions wey di law recognise.
PDP na ghost of im former sef now
Wia dis foto come from, Nyesom Wike/Samuel Anyanwu/Kabiru Turaki/Seyi Makinde
Already, plenty members of di PDP, including some of dia guvnors don leave di party sake of fear say dis internal crisis fit make Inec disqualify di party from bringing out candidates for di 2027 elections.
Di PDP bin dey in control of 12 states afta di 2023 general elections: Adamawa, Akwa Ibom, Bauchi, Bayelsa, Cross River, Delta, Oyo, Osun, Plateau, Rivers, Taraba, Zamfara, but now, na only three of di States still get PDP guvnors, odas don enta APC except Osun State guvnor Ademola Adeleke wey join Accord Party.
Also dozens of di state and federal lawmakers wey bin win dia seats for PDP don leave di party, majority of dem join di ruling APC.
Last week, Mustapha Kaura, di tok-tok pesin for di guvnor of Zamfara State Dauda Lawal, tok say di guvnor dey wait for di judgement of di court of appeal bifor e go decide weda to leave di party or not.
Kaura also tok say di guvnor neva tok say e go join di ruling APC even if e decide to leave di PDP.
