Wia dis foto come from, NDC
Published
Read am in 6 mins
Di presidential candidate of di Nigeria Democratic Congress (NDC) for di 2027 general elections, Peter Obi dey trend since Tuesday.
E begin trend afta e claim say jaguda pipo attack am for Benue State, nortncentral Nigeria.
Di Nigerian politician bin wan go visit victims of attacks but according to di former Anambra State govnor, di planned visit no hold against as dem waka go anoda place for Plateau State.
For statement wey im post for im verified page Peter Obi explain wetin happun for Benue on September, 2026.
“I bin travel to Benue dis morning (Tuesday), I arrive at approximately 9:00 a.m. on purely humanitarian mission: to visit di grieving families wey dey affected by di horrific killings for Yelwata, wia ova 270 pipo bin kpai.
“Regrettably, community thugs stop our convoy make e no enta di community, dem dey chant, ‘Peter Obi, go back.’ E dey deeply distressing to witness dat kain hostility.”
Peter Obi say im bin go Benue to mourn wit di pipo, to listen to di families wey lose dia loved ones and to comfort dem, no be for partisan politics.
But di Benue State Govment in response accuse Peter Obi say e breach protocol wit im visit to to di state on Tuesday.
Di Commissioner for Information and Culture, Solomon Lorpev, tok for local media Channels Television on dia show The Morning Brief on Wednesday, say Peter Obi bin no tell Govnor Hyacinth Alia officially officially about im visit.
“First of all, I want to lay aside di claim say di govment send pipo to go stop am from coming into town; dat na becos we no even officially dey aware say im dey come into town,” im tok.
Lorpev argue say e dey strange say pesin wey be former govnor no go tell di state govnor about im plan to visit di state.
“E dey quite strange becos, for a man of im calibre, two time governor of state, na di second time wey im dey contest for presidency; dat kind of pesin become di responsibility of di state as far as security dey concerned wen e enta di state,” im tok
“So to choose not to inform di state govment say im dey come na breach of protocol becos anytin fit happun around am, di govment no dey aware, we no know about am at all.
But any law dey wey dey restrict pesin movement from wia e go go and wia not to go? Abi protocol dey wey ogbonge politicians or big names suppose follow bifor dem visit anywia for di kontri? Sabi pipo ansa dis quesion.
Law dey wey dey control which state pesin go visit or not?
One lawyer wey also be human right activist, Chetam Nwala tell BBC News Pidgin say no wia for di Nigerian Constitution dey restrict pipo movement.
“Di Constitution guarantee evri Nigerian to visit any state and any part of di kontri wey dem like witout any form of restriction, na fundamental human right wey di Constitution give evribody and also construct by di African Charter on Human and People’s Rights”.
Im explain say as e be so “no govnor, individual or even di president fit restrict di movement of anybody wey dey visit any part of di kontri, but im add few exceptions like for pipo wey dey prison and criminals.
“Except na wen dem declare curfew for security reasons and pipo dey restricted from moving about or to go a particular area, or wia outbreak of disease dey and authorities for di areas say make pipo no come make dem no dey infected, or pesin wey dey imprisoned by court.”
Sabi pipo say Section 41 of di Nigerian Constitution guarantees evri Nigerian freedom of movement.
But why govnors dey want di official travel information wen ogbonge pipo dey visit dia state?
Political analyst Olalekan Ige tell BBC News Pidgin say even though e no dey for Nigeria Constitution to restrict pesin movement, e get wetin be courtesy wey be like respect wey both di govnor and di ogbonge pesin wey dey visit suppose give each oda.
“Courtesy suppose dey especially wen you be VIP wey dey visit pesin state or area, dem fit need to make some arrasngements to make sure say di ogbonge pesin dey okay. At least tell di govnor say I dey come your state or i go. visit your area on so so and so time.
Tori be say di NDC bin write letter to di Commissioner of Police for di state but di political expert say e for still tell di govnor officially say e dey come.
“Even though Peter Obi claim say e officially write to di Commissioner of Police for di state, e for still tell di govnor officially say e dey come na courtesy.” Ige tok.
No be dis first time dis kain situation dey happun for Nigeria political space.
E dey happun for outside and within di state of politicians wey dey opposing parties or wey dey get kasala.
For 2013 Police bin no allow former Rivers State Govnor, Chibuike Amaechi to enta Govment House.
For November same year security pipo bin block Amaechi for di Port Harcourt International Airport wen im bin wan go welcome leaders of di All Progressives Congress (APC) wey dem bin jiust form, di blockade no last as im supporters bin open di gates by force.
Di one wey dey common pass na executive orders from state govnors wey dey barr opposition parties make dem no use dia facilities for campaign and rallies.
For November 2022, former Rivers State Governor Nyesom Wike bin ban di use of premises, buildings, and structures in residential areas for urban and non-urban areas as campaign offices by political parties without approval insid eim Executive Order 22.
E bin also sign di Executive Order 21, wey bin say political parties must pay non-refundable caution fee of five million naira ($3.7million) bifor dem use any public facility for campaigns.
Dis order dat time bin no allow opposition groups like di All Progressives Congress (APC) and Labour Party (LP)to organise public visits or rallies for di state.
For Kogi State di state govment bin put moey and security clearance wey no easy ontop political banners and public meetings, so dat e go hard for opposition to do any programme .
Anoda one na wen security pipo bin restrict former Kaduna State Governor Nasir El-Rufai during election make e no go on monitoring visit to Anambra State.
Di one wey pipo bin tok about well-well na di “Million-Man” Marches – wey be grassroots rallies for opposition candidate of Labour Party Peter Obi for di 2023 election wey bin face faced bans for some states like Lagos and oda parts of di kontri.
