Sean “Diddy” Combs ex-girlfriend, Casandra Ventura, don tell di hip-hop mogul sex-trafficking trial say e control her life and make her do “humiliating” sex acts.
Di prosecution star witness testify about di alleged physical and emotional abuse she endure for di hands of di rapper during di so-called “freak-offs”, or sexual encounters di couple get wit male escorts.
Family and friends come court in large numbers to support Mr Combs, im legal team never question Ms Ventura yet.
Mr Combs don plead not guilty to charges including racketeering conspiracy, sex trafficking, and transportation to engage in prostitution.
Warning: Dis tori contains details wey fit turn some readers belle.
Ms Ventura fall ‘in love’ with Mr Combs
Prosecutors begin by questioning Ms Ventura – one of dia two central witnesses for di case – about her 11-year, on-and-off relationship wit Mr Combs.
Now 38 and pregnant wit her third child, she meet Mr Combs wen she be 19-year-old aspiring singer and e be 37.
Im record label go later sign Ms Ventura as artist, and small time afterwards, dia romantic relationship begin.
At di time, she testify say she feel like say dem inside monogamous relationship, though she know now say e get oda girlfriends.
She say she “fall in love” with di “larger-dan-life entrepreneur and musician”. But e no dey long before she notice anoda side to am, she tok.
Mr Combs bin wan ‘control’ every part of her life, Ms Ventura tok
Mr Combs bin wan “control” her life, Ms Ventura tok. She say e pay for her home, her cars, her phone and oda technology and say e go sometimes take dem away to “punish” her.
“Control na everything, from di way I look… to wetin I dey work on,” Ms Ventura tok.
Eventually, she claim say di control turn violent. Mr Combs go “bash on my head, knock me over, drag me and kick me” frequently, Ms Ventura testify, sometimes through tears.
She allege say she get swollen lips, black eyes and knots for her forehead.
Ms Ventura feel ‘humiliated’ by ‘freak-offs’
Prosecutors spend hours on Tuesday asking Ms Ventura about so-called “freak-offs”.
Ms Ventura tell di court how Mr Combs introduce her to di sexual events during di first year of dia relationship. Dem go hire a male escort or stripper to have sex with Ms Ventura while Mr Combs go dey watch.
Ms Ventura tell di court say she first try dem to make Mr Combs “happy”. But she say di tin dey humiliate her, and sometimes e dey last three to four days.
“I bin feel pretty horrible about myself,” she tell di court, as she wipe away tears. “E make me feel worthless.”
Ms Ventura tell di court say she bin no ever want sex wit anyone but Mr Combs, and claim say she go take drugs – marijuana, ecstasy and ketamine – to help her perform to Mr Combs satisfaction, but also to “disassociate”.
Di drugs na “a way to not feel am for wetin e really be”, she tok, “having sex wit a stranger wey I really bin no wan have sex with”.
Mr Combs fly male escorts in for freak-offs, court hear
As prosecutors press Ms Ventura about di “freak-offs”, she tell di court of how Mr Combs go direct her to find male escorts, strippers or dancers to have sex wit while e go dey watch.
She allege say Mr Combs go pay di men anywhere from $1,500 to $6,000 in cash, depending on dia performance.
Dem dey find di men through stripper companies and sites like Craigslist. Some of dia photos bin dey displayed to di jurors, including Daniel Phillip, wey finish im testimony earlier on Tuesday.
Ms Ventura and Mr Combs get di encounters for cities around di world, including Los Angeles, New York, Las Vegas and Ibiza, Spain, Ms Ventura testify.
Sometimes, men go fly in during vacations, she allege, and Mr Combs go direct her to ask staff to pay for and arrange dia travel, calling dem new employees.
Among oda charges, prosecutors dey try to prove say Mr Combs engage in sex trafficking – human trafficking for di purpose of sexual exploitation – and transportation to engage in prostitution.
Mr Combs dey ‘direct’, Ms Ventura tok
As prosecutors press Ms Ventura for graphic details, one key element come out: Ms Ventura claim say Mr Combs control every part of di encounters.
E dey chose di cloth she wear – down to di very high heels she dey wear for hours – as well as di sexual acts wey dey hapun and di lighting, Ms Ventura tell di jurors.
“If Sean want something to happen, dat na wetin go happen,” she tok. “I no fit say no.”
Sometimes, Ms Ventura tok, she go take di lead on which male escorts to hire because Mr Combs dey “very busy”, but she only do am at im direction, she tok.
She say freak-offs get a very specific “pattern” of sexual acts each time.
“E dey control di whole situation,” she allege. “E dey direct it.”
At times, Ms Ventura tok, she try to tell Mr Combs say she feel “horrible”. But wen e dismiss her concerns, she say, she go leave am, becos of worry say e go vex or question dia relationship.
Ms Ventura dey expected to continue her testimony on Wednesday, wen she go also face cross-examination.
