Heads of state, heads of goment and monarchs from around di world attend Pope Francis’ funeral
Cardinals go meet next month in one secret conclave to elect di next pope, di Vatican tok.
Di closed-door meeting go start inside di Sistine Chapel on 7 May and go involve some 135 cardinals from across di world.
Dis na afta di death of Pope Francis wey die at di age of 88 on Easter Monday, im funeral hold on Saturday.
Timescale no dey as to how long e go take to elect di next pope, but di previous two conclaves, hold in 2005 and 2013, e last for just two days.
Once dem enta di Sistine Chapel, cardinals no go get any communication wit di outside world until dem elect new Pope.
Na only one round of voting on di first afternoon of di conclave, but di cardinals go vote up to four times evri day aftawards.
New pope go require two-thirds majority – and dat fit take time.
Each cardinal go cast im vote on simple card and e go tok, for Latin: “I elect as Supreme Pontiff” di name of dia chosen candidate.
If di conclave complete afta third day without reaching decision, di cardinals fit pause for one day for prayer.
Outside di Sistine Chapel di world go dey watch for di smoke from di chimney.
If di smoke na black, dem go get anoda round of voting. White smoke signal say dem don choose new pope.
On Saturday, politicians and royalty join thousands of mourners as Pope Francis funeral hold for St Peter’s Square.
Hymns play out on giant speakers, occasionally drown out by di sound of helicopters flying overhead, before 91-year-old Cardinal Giovanni Battista Re give homily on di pope legacy.
Afta di ceremony, huge crowds line di streets of Rome to watch as dem carry di Pope for im procession to im final resting place, Santa Maria Maggiore Basilica.
Authorities tok say 140,000 pipo don line di streets, clapping and waving as di hearse – repurposed white popemobile – crossed di Tiber river and drive past some of Rome most recognisable sights: di Colosseum, di Forum and di Altare della Patria national monument on Piazza Venezia.
On Sunday dem release fotos of Pope Francis tomb at di church showing one single white rose lying on di stone wey dey bear di name wey dem dey call am by during im pontificate, below one crucifix illuminated by one single spotlight.
